Jul 13, 2026
पुणे | प्रतिनिधी : अखिल भारतीय मराठी चित्रपट महामंडळ आणि बालगंधर्व परिवार ट्रस्ट, पुणे यांच्या संयुक्त विद्यमाने आयोजित करण्यात आलेल्या भव्य “कलाकारांच्या दिंडी” या सांस्कृतिक सोहळ्यात रिपब्लिकन पार्टी ऑफ इंडिया (आठवले गट) महाराष्ट्राच्या चीफ सेक्रेटरी, सामाजिक कार्यकर्त्या तसेच संघमित्रा फिल्म प्रॉडक्शनच्या निर्मात्या संघमित्रा ताई गायकवाड यांनी उत्स्फूर्त सहभाग नोंदवत सांस्कृतिक ऐक्याचा संदेश दिला.
बालगंधर्व रंगमंदिरातून प्रारंभ झालेल्या या दिंडीत नाटक, चित्रपट, दूरचित्रवाणी मालिका, संगीत, नृत्य आणि साहित्य क्षेत्रातील अनेक मान्यवर कलाकार सहभागी झाले. वारकरी परंपरा, महाराष्ट्राची समृद्ध सांस्कृतिक परंपरा आणि कलाविश्व यांचा सुंदर संगम या दिंडीत अनुभवायला मिळाला.
यावेळी अखिल भारतीय मराठी चित्रपट महामंडळाचे अध्यक्ष मेघराज राजेभोसले, महाराष्ट्र राज्याचे कॅबिनेट मंत्री उदय सामंत यांच्या सुविद्य पत्नी व ज्येष्ठ अभिनेत्री नीलम शिर्के, ज्येष्ठ कलाकार प्रशांत बोगम, भूमाता ब्रिगेडच्या अध्यक्षा तृप्ती देसाई यांच्यासह चित्रपट निर्माती संघमित्रा ताई गायकवाड यांनी दिंडीत सहभागी होत कलाकारांशी संवाद साधला आणि सांस्कृतिक परंपरेला अभिवादन केले.
याप्रसंगी संघमित्रा ताई गायकवाड म्हणाल्या, “महाराष्ट्राची कला, संस्कृती आणि संत परंपरा ही आपली अमूल्य ओळख आहे. कलाकारांनी समाजाला एकत्र आणण्याचे कार्य करावे आणि अशा उपक्रमांमधून आपल्या सांस्कृतिक वारशाचा ठेवा पुढील पिढीपर्यंत पोहोचवावा.”
दिंडीनंतर आयोजित सामाजिक उपक्रमात पालखीसोबत चालणाऱ्या वारकरी, पालखी सेवक आणि गरजू बांधवांना ब्लँकेट, चादरी, साड्या तसेच इतर आवश्यक जीवनोपयोगी वस्तूंचे वाटप करण्यात आले. या सेवाभावी उपक्रमाला उपस्थितांनी उत्स्फूर्त प्रतिसाद देत आयोजकांचे कौतुक केले.
या दिंडीत सहभागी झालेल्या विविध क्षेत्रातील कलाकार आणि मान्यवरांच्या उपस्थितीमुळे कार्यक्रमाला विशेष रंगत आली. कला, संस्कृती, समाजसेवा आणि सामाजिक ऐक्याचा संदेश देणारा हा उपक्रम उपस्थितांच्या उत्स्फूर्त प्रतिसादात यशस्वीरीत्या पार पडला.
कलाकारांच्या दिंडीत रिपब्लिकन नेत्या तथा निर्माती संघमित्रा ताई गायकवाड यांचा उत्स्फूर्त सहभाग